𝐃𝐢́𝐥𝐢, 𝟏𝟎/𝟏𝟏/𝟐𝟎𝟐𝟓 : Vise-Primeiru-Ministru no Ministru Koordenadór Asuntu Sosiais no Ministru Dezenvolvimentu Rurál no Abitasaun Komunitária, Eng. Mariano ASSANAMI Sabino Promove Jornalizmu Foinsa’e no Edukasaun ba Labarik liu husi Revista Lafaek, tanba edukasaun no literasia mak fator fundamental atu hadia lideransa juventude sira iha Timor-Leste.

Vise-Primeiru-Ministru hato’o mensajen ida ne’e durante entrevista ho jornalista foinsa’e nain tolu iha loron 10 Novembru 2025, ne’ebé fó énfase ba futuru edukasaun nasional no papel importante ne’ebé Revista Lafaek hala’o iha dezenvolvimentu lideransa entre labarik no jovem sira.

Enkontru ida ne’e organiza hosi CARE Timor-Leste liu hosi Projetu Lafaek, atu fó espasu diskusaun kona-ba importância envolvimentu inan-aman iha aprendizajen labarik sira. Revista Lafaek, ne’ebé hahú publika iha tinan 2001, sai hanesan rekursu edukasionál importante ba estudante, manorin no komunidade sira iha área rurál Timor-Leste nian.

Durante entrevista, Vise PM enkoraja jornalista foinsa’e sira atu hadia kapasidade-an no prepara-an hodi sai lider responsable no kapás iha futuru.

“Ema hotu-hotu tenke moris hanesan. Feto ka mane, la presiza haree ba sirkunstánsia. Labarik hotu-hotu tenke ba eskola, liuliu labarik feto sira. Bainhira labarik feto sira aprende no buras liu tan liu hosi edukasaun, ita nia nasaun sei sai forte liutan,” hatete Vise-Primeiru-Ministru.

Nia mos subliña importância uza lian Tetun iha aprendizajen, “Revista Lafaek iha lian Tetun ajuda tebes labarik sira atu aprende no ko’alia loloos. Bainhira ita fahe koñesimentu tuir dalan ne’ebé sira kompriende, ita mak halo investimentu ba líder sira iha futuru.”

Embaixadora Nova Zelándia iha Timor-Leste, S.E. Helen Tunnah, mos afirma sei apoiu kontinu ba inisiativa ne’e hodi hadia oportunidade aprendizajen ba labarik sira.

“Apoiu ne’e importante tebes, liu-liu atu ajuda labarik sira aprende liu husi lian Tetun. Apoiu ida ne’e mos kontribui ba dezenvolvimentu edukasaun pré-eskolár no infánsia iha Timor-Leste,” hatete nia.

CARE Timor-Leste hato’o agradesimentu ba Vise-Primeiru-Ministru Eng. Mariano Assanami Sabino nia apoiu permanente ba Projetu Lafaek no ninia kompromisu atu kontinua empodera juventude Timor-Leste nian.