Nay Pyi Taw, Myanmar, 20 Novembru 2025

Sekretáriu-Jerál ASEAN, Dr.Kao Kim Hourn, hasoru malu ho Ministru Transporte no Komunikasaun, Eng.Miguel Marques Gonçalves Manetelu, iha Reuniaun Ministru Transporte ASEAN bá dala 31 iha Nay Pyi Taw, Myanmar.

Kao Kim Hourn kongratula Timor-Leste nia adezaun nu’udar Membru ASEAN bá dala 11 no hato’o apresiasaun bá submisaun instrumentu adezaun bá akordu prinsipál transporte aéreu ASEAN nian.

Nia reafirma kompromisu ASEAN nian atu apoia Timor-Leste nia integrasaun iha Merkadu Úniku Aviasaun ASEAN nian no tulun ninia partisipasaun iha futuru iha Akordu Servisu Aéreu Parseiru Diálogu ASEAN nian hodi hametin ninia konetividade rejionál no internasionál.

Dr.Kao informa iha enkontru katak Planu Setoriál Transporte ASEAN foun (ATSP) 2026-2030 sei orienta ASEAN nia esforsu sira atu harii rejiaun ida ne'ebé sustentável, reziliente no ligadu ho di'ak hodi apoia implementasaun Planu Estratéjiku Komunidade Ekonómika ASEAN nian 2026-2030 no kontribui bá realizasaun Vizaun Komunidade ASEAN nian 2045. Nia destaka mós nesesidade bá kolaborasaun kontinua entre Estadu-membru sira ASEAN nian no Parseiru Diálogu nian sira atu garante katak transporte sai nafatin motor xave ida bá integrasaun rejionál no kreximentu sustentável.

𝐌𝐞́𝐝𝐢𝐚 𝐌𝐓𝐊