23 Novembru 2025: Ministra Saúde (MS) dr. Élia A.A. dos Reis Amaral, SH hamutuk Vise-Ministru ba Fortalesimentu Institusional Saúde (VMFIS), Sr. José dos Reis Magno Lic. SP, MM.

Partisipa iha serimónia despedida ba bolseiru medisina hamutuk ema na’in 30 ne’ebé sei kontinua sira-nia estudu espesializadu iha área oioin saúde nian, Iha Havana, Cuba ba Tinan 2025-2026, Iha Salaun Enkontru, Palácio das Cinzas, Caicoli, Dili.

Ministériu Saúde (Mds) despede bolseiru Medisina Espesialista tolu-nulu (30) kompostu hosi feto sanulu (10) no mane rua-nulu (20).

MS iha ninia diskursu haktuir “Ita boot sira hatene katak kapasitasaun Rekursu Umanu nian faz parte ba iha IX governu nian, tanba prestasaun servisu kuidadu saúde sekundária no tersiaria ita presiza espesialita, ne’ebé agradese ba Ministériu Planeamentu no Investimentu Estratéjiku (MPIE) ho nia ekipa tomak, ne’ebé mak sempre apoiu ba iha servisu oinsá atu hasa’e kapasitasaun.

Kapasitasaun ne’ebé mak ita iha no haruka ba iha rai-liur hanesan nasaun Cuba iha mós balun liuhosi parseiru sira liuliu Nasaun Fiji, ita mós tentativa atu ba Filipina, Papua, Nova-Guine, sira ne’e hotu hola parte ba iha programa hosi IX governu nian.”

Iha sorin seluk MS mós informa, MdS mós planeia atu kontinua halo selesaun ba Profesionál Saúde sira ne’ebé atu hasai sira-nia espesialidade ba tinan oin ho totál vaga 40 ka 50, ne’ebé mak sei kontinua nafatin hala’o estudu iha rai liur.

MdS mós hala’o hela koordenasaun ho governu Australia ne’ebé mak agora hala’o hela kapasitasaun iha pós-graduasaun kada sira-nia estudu.

MS husu ba servisu médiku sira katak servisu iha medisina ne’e hanesan misaun ida ne’ebé bolu hosi ita-nia fuan, ne’ebé mak hakarak sai médiku, maibé husu mós atu tau atensaun ba sira-nia saúde.

MdS mós halo akordu ho bolseiru espesialista sira antes atu ba halo estudu iha Havana, Cuba signifika Ita-Boot sira hola parte hanesan servisu estadu no públiku, tanba IX Governu komprimisu katak oinsá atu hakbesik no hadi’a atendimentu ba populasaun tomak.

Partisipa iha serimónia despedida ne’e maka; Kuadrus Ezekutivus MdS nian, Reprentante hosi Instituto Nacional da Administrasaun Públika (INAP), Fundo Dezenvolvimento Capital Humano (FDCH), Funsionáriu, Família bolseiru, Mídia no Seluk-seluk tán.

#MídiaPalácioDasCinzas