Díli, loron 19 fulan Novembru 2025 - Sua Ministra Edukasaun, Dra. Dulce de Jesus Soares, akompaña husi Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, asina memorandu entendimentu ho Institutu São João de Brito Liquiçá, iha sala VIP Ministériu Edukasauan, Vila-Verde.

Iha diskursu, Sua Exelénsia Ministra Edukasaun, Dra. Dulce de Jesus Soares, hateten, ohin asina akordu entre Ministériu Edukasaun, INFORDEPE no Institutu São João de Brito (ISJB), hanesan aktu ida atu simboliza determinasaun governu nian hodi tau kualidade edukasaun no valorizasaun ba profisaun manorin-na’in sira nian iha sentru prioridade estadu nian.

“Ita sei kontinua investe iha formasaun kontínua, formasaun preparatória, formasaun espesializada no haforsa abilidade profisionál ba ita-nia mestre sira. Ita sei kontinua estabelese parseria estratéjika ho instituisaun exelente sira. No ami sei kontinua servisu, atu nune'e eskola ida-idak iha Suku, Postu Administrativu no iha Munisípiu ida-idak, iha profesór sira ne'ebé preparadu didi'ak, motivadu no rekoñese liuhosi sira-nia misaun”, dehan S. E. Ministra Edukasaun.

Governante ne’e afirma katak, la iha dezenvolvimentu nasionál ida-ne'ebé mak lahó profesór sira ne'ebé forte, preparadu no formadu, tanba governu ida-ne'e prepara ona atu mobiliza rekursu umanu, instituisaun no parseiru sira hodi asegura katak sistema edukasaun ba Timor-oan sira, iha profisionál sira ne'ebé aas liu dezafiu sira iha sékulu 21, atu bele hanorin ho di’ak liután.

Iha fatin hanesan, Sua Exelénsia Sekretáriu Estadu ESJ-ESTV, hateten, ohin Ministériu Edukasaun asina memorandu ho Institutu São João de Brito Liquiçá, hodi prepara formasaun ba profesór bolsa kandidatura husi Ensinu Sekundáriu Jerál no Ensinu Sekundáriu Tékniku Vokasionál iha tempu badak.

"Profesór ne'ebé tuir formasaun ne’e hamutuk na'in 250. Etapa Primeiru hahú profesór na’in 125 husi loron 1 fulan Dezembru to'o loron 6, no etapa segundu profesór 125, iha loron 8 fulan Dezembru. formasaun ne'e iha módulu 5 mak Profesór sira sei hetan iha formasaun, hanesan Lejislasaun, Pedagójiku, Kurríkulu, Informasaun Komunikasaun no Teknolojia (ICT) no Fraternidade Umana", dehan S. E. Sekretáriu Estadu.

Governante ne’e mós husu Profesór sira atu aproveita tempu ho di'ak durante formasaun no tenki iha seriedade, tanba formasaun karakter profesór ne’e importante tebetebes ba profesór sira iha profisaun loroloron nian.

Iha fatin hanesan Reitór Institutu São João de Brito, Reverendu Padre Isaías Abílio Caldas, akrexenta, momentu ida-ne’e hanesan konfiansa ida-ne'ebé estadu Timor-Leste liuhusi Ministériu Edukasaun depozita mai Institutu atu bele servisu hamutuk hodi lori edukasaun ba kualidade ida-ne’ebé di’ak liu, liuhusi formasaun sira ne’ebé fó.

"Edukasaun Timor nian ne'e ita hotu-hotu nia responsabilidade, ida-ne'e hanesan konfiansa ida ne'ebé tenki ezije ami-nia responsabilidade hodi kontribui, servisu hamutuk atu bele kontribui ba edukasaun ida ne’ebé di’ak liu ba timoroan sira", dehan Reitór ISJB.

Aleinde ne’e, Prezidente INFORDEPE, Sr. Domingos Martins, hateten, ohin asinatura akordu kooperasaun no programa kontratu ne’e, atu estabelese implementasaun kursu formasaun preparatória ba dosénsia hamutuk na’in 250 Ensinu Sekundária sira husi Bolsa Kandidatu ne’ebé sei fahe ba faze rua hanesan: Faze I profesór hamutuk 125 mak sei bá tuir uluk formasaun iha loron 1 to’o 6 fulan dezembru no faze II, profesór hamutuk na’in 125 sei kontinua fali formasaun iha loron 8 to’o 13 fulan dezembru.

“Objetivu prinsipál husi kursu ida-ne'e atu asegura katak profesór foun sira ne'ebé foin tama iha profisaun profesór nian presiza iha abilidade edukasaun, téknika no étika ne'ebé presiza atu asegura edukasaun ho kualidade iha eskola hotu”, dehan Prezidente INFORDEPE.

Prezidente INFORDEPE hatutan, treinamentu ne’e sei fó direta husi treinadór na'in 17 ne'ebé kualifikadu tebes husi INFORDEPE, Ministériu Edukasaun, Institutu São João de Brito no entidade parseiru sira-seluk hanesan Polísia Nasionál Timor-Leste (PNTL), ne'ebé atu asegura formasaun ba formasaun uniforme loroloron, dadeer no lokraik ba profesór sira hotu ne'ebé partisipa iha faze I no II no apoiu hosi Sekretaria Estadu Igualdade hodi garante partisipante sira atu moris iha esperiénsia formasaun ida-ne'ebé komprensivu, promove dixiplina, responsabilidade no espíritu komunidade.

Formasaun ne'e sei hala'o iha Sentru Formasaun ESTV Corluli, ne’ebé lokaliza iha Aldeia Moleana, Suku Ritabou, Postu Administrativu Maliana, Munisipiu Bobonaro, ne'ebé ninia infraestrutura sira prepara ona atu hala’o atividade formasaun ne'ebé intensivu ba kapasitasaun manorin sira-nian.

#MédiaME