Baucau, 17 Novembru 2025 - Ministériu Edukasaun liuhosi Diretór Jerál Edukasaun Pré-Eskolár, Ensinu Báziku no Ensinu Rekorrente (DG-EPEBER) Sr. Apolinario Serpa Rosa hamutuk ho Sub-Inspetór Jerál, Nukleu no Administrasaun Eskolár Sr. Rodolfo Henrique Aparicio, reprezentante PAM Baucau Sr. Francisco X. da S. Guterres, Program Manager MMT (Mery Mackillop today) Sra. Agustinha Ximenes, halo abertura ba Formasaun Rejionál kona-ba oinsá uza Aplikativu HAAP (Hanorin no Aprende) ba Inspetór pré-eskolár sira iha Salaun EBC Vila-Nova Tirilolo Munisípiu Baucau.

Iha diskursu, DG-EPEBER Apolinario Serpa Rosa hateten, alin manorin no Inspetór sira, formasaun ohin loron ida-ne’e importante tebes ba Ita-Boot sira, tanba Ita-Boot sira maka sai hanesan matadalan depois de formasaun ida ne’e sei kontinua fahe ba estudante sira.

“Ba manorin sira oinsá maka bele utiliza fasilidade android ne’ebé maka sei instala aplikasaun HAAP, manorin sira tenke iha abilidade oinsá maka tenke utiliza aplikasaun iha prosesu aprendizajen tanba iha aplikasaun ne’e instala ona metodolojia no oinsá maka labarik sira bele aprende no halimar, liuhosi aplikasaun ida-ne’e sira bele hetan koñesimentu kona-ba Literasia no númerasia”, dehan DG-EPEBER.

Aleinde ne'e, reprezentante husi PAM Baucau Sr. Francisco X. da S. Guterres hateten, ha'u husu ba partisipante sira aprende no foku ba asuntu ida ne’e husu atu akompaña durante semana ida hahú husi loron 17 to’o loron 21, aproveita tempu ida-ne’e sai hanesan osan mean ba imi atu hetan matenek husi ita nia formadór sira.

Iha sorin seluk, Program Manager MMT (Mery Mackillop today) Sra. Agustinha Ximenes hateten, Mery Mackillop Today servisu hamutuk ho Ministériu Edukasaun liuliu iha Diresaun Pré-Eskolár halo formasaun ba manorin sira iha territóriu Timor laran tomak inklui RAEOA, husi inísiu to’o ohin loron Mery Mackillop Today servisu hamutuk ho Ministériu Edukasaun kontinua fó apoiu hodi alkansa ita nia planu estratéjiku sira.

#MédiaME

#JornalistaJuliobertodosReis