𝗗𝗜𝗟𝗜,𝟮𝟭 𝗡𝗼𝘃𝗲𝗺𝗯𝗿𝘂 𝟮𝟬𝟮𝟱

Primeiru-Ministru (PM), Kay Rala Xanana Gusmão hamutuk ho Ministru Obras Públikus (MOP), Samuel Marçal observa kontrusaun edifísiu foun ne’ebé sei oferese bá grupu Klibur Defisiénsia Tilun Timor-Leste (KDTL), iha área Kampu Hudi-Laran, Fatuhada, Dili, sesta (21/11/2025).

Antes ne’e, iha loron 1 Setembru 2025, Primeiru-Ministru Xanana hala'o vizita bá maluk sira ne'ebé halibur-an iha Klibur Defisiénsia Tilun Timor-Leste (KDTL) hodi observa sira fatin la iha kondisoes atu hala’o servisu.

KDTL halibur maluk sira neʼebé ho problema tilun ka maluk sira ne'ebé labele rona no labele ko'alia ka baibain bolu defisiénsia tilun.

KDTL ne'e hanesan mós membru hosi Assosiasaun Defisiénsia Timor-Leste (ADTL) ne'ebé eziste hodi haree espesífiku-liu bá maluk sira ho defisiénsia tilun ho nia koordenadora maka Crecênsia Madeira de Deus.

KDTL foin mak hetan apoiu oitoan husi ADTL ho Ministériu Solidariedade Sosiál no Inkluzaun (MSSI) hodi halo no dezenvolve formasaun sira mak hanesan dezenvolve Lian Jestuál, dezenvolve Lian Jestu Nasionál. Iha mós apoiu husi Sekretária Estadu Igualdade (SEI) bá atividade sensibilizasaun nian.

Edifísiu foun ne’e tuir planu, KDTL sei uza hodi oferese formasaun bá maluk defisiénsia tilun 100-resin mai-husi munisípiu neʼebé diferente.

Maluk defisiénsia sira ne'e hela iha idaidak ninia uma privada iha Dili laran no lorloron bá tuir formasaun iha sentru ne'e.

𝗠𝗶́𝗱𝗶𝗮-𝗠𝗢𝗣