Dili, 25 Novembru 2025

Kompaña Irmaun Sandobe tersa ne’e entrega rehabilitasaun terminál pasajeiru portu Dili bá Ministériu Transporte no Komunikasaun.

Terminál pasajeiru portu Dili ne'e hetan bensaun husi Pe. Mariano Quintao Do Rego.

Rehabilitasaun terminál ne’ebé sei entrega bá APORTIL, importante tebes tanba sei garante espasu ida ne’ebé sufisiente, seguru no adekuadu bá sidadaun sira ne’ebé sei halo viagem bá Oecuse no Atauro. Maibe mós, ho rehabilitasaun ne’e, sei oferese espasu servisu ne’ebé diak liu bá ekipa APORTIL nian hodi servisu no fo atendimentu.

Inisitiva ida ne’e, hanesan mós ho inisiativa sira seluk, halo parte bá Governu Konstitusionál da sia nia mehi atu moderniza infraestrutura iha lideransa Primeiru Ministru Kay Rala Xanana Gusmão nian. Governu kompromete atu mellora konetividade, promove liu taan atividades ekonómikas oin-oin no asegura katak rejiaun hanesan Atauro no Oecusse, konetadu no ho atendimentu ida diak liu” dehan Ministru Manetelu.

Ministru Manetelu afirma katak Governu nafatin iha komitmentu metin atu hadi'a liután ita-nia instalasaun portu sira iha Timor laran tomak.

“Wainhira rehabilita tiha terminál ne’e, fó lembra bá ita katak dezenvolvimentu ne’e esforsu ida ho nia kontinuidade. Haree bá oin, Governu nafatin iha komitmentu metin atu hadi'a liután ita-nia instalasaun portu sira iha Timor laran tomak. Estudu viabilidades bá ita nia portus lao dadaun no ita halo esforsu hotu-hotu atu hahú ho prosesu konstrusaun balun iha tinan oin. Ita-nia vizaun la'os de'it atu apoia atividade komersiál no hametin ita-nia ekonomia, maibé mós atu harii portu modernu, mós no efisiente, ne'ebé reflete ita-nia povu nia orgullu no dignidade. Dezenvolvimentu hirak-ne'e sei kontribui bá servisu ne'ebé di'ak liu, konetividade nasionál ne'ebé boot liu no sentimentu na'in no konfiansa ne'ebé forte liu entre ita-nia sidadaun sira iha “Timor-Leste ida ne’ebé sira pertense no sira hadomi” Ministru Manetelu afirma.

Governu kompremetidu no iha komitmentu atu oferese liu tan infraestrutura di’ak liu, mellora atendimentus no garante sidadaun sira konekta bá malu ho di’ak liu. Hein katak, terminál pasajeirus ida ne’e oferese liu tan konfortu no seguru bá ema hotu no hein katak bele fasilita di’ak liu atendimentu sidadaun sira nian iha portu Dili.

𝐌𝐞́𝐝𝐢𝐚 𝐌𝐓𝐊