Dili, 25 Novembru 2025 – Ministériu Juventude, Desportu, Arte, no Kultura (MJDAC) no UNICEF hamutuk lansa ona projetu úniku ida hodi hasa’e kapasidade Parlamentu Foinsa’e Nian (PFN) no fó impaktu pozitivu ba komunidade rurál sira!

UNICEF apoia hela US$1,000 (Dolar Amerikanu Rihun Ida) hodi implementa programa sira ne’ebé krítiku ba moris loron-loron nian iha baze.

FORMASAUN BA FUTURU LIDER SIRA

Diretór Jerál Juventude, David Tomás de Deus, hateten katak projetu ne’e nu’udar formasaun ba integridade:

"Projetu ki'ik sira ne'e ho objetivu atu kapasita ita-boot sira hodi komprende saida maka presiza atu sai líder ida ho integridade no onestidade. Labele husu de'it, maibé implementa no ezekuta orsamentu ho dignidade!"

PROGRAMA 4 BA MUNISIPIU HOTU

UNICEF nia Xefe Polítika Sosiál, Soumen Ray, subliña katak inisiativa ne’e sei kobre sidade 13 no postu administrativu 63!

Orsamentu ne’e sei foka ba programa importante haat:

Harii/Hadi'a haris fatin Eskola nian.

Reabilitasaun ba Eskola sira.

Fornesimentu Bee Moos ba Komunidade.

Halo reabilitasaun ba kampu futeból sira.

MJDAC no PFN komprometidu atu uza fundu sira ne’e ho matenek hodi hasa’e kualidade moris iha baze!