𝗞𝗼𝘃𝗮𝗹𝗶𝗺𝗮, 𝟮𝟱 𝗡𝗼𝘃𝗲𝗺𝗯𝗿𝘂 𝟮𝟬𝟮𝟱

Ministru Obras Públiku, Samuel Marçal akompaña husi Ministru Asuntus Kombatentes Libertasaun Nasionál, Gil da Costa Monteiro “Oan Soru”, Vise-Ministru bá Infraestruturas, Júlio do Carmo, Vise-Ministru bá Fortalesimentu Institusionál Saúde, José dos Reis Magno, Sekretáriu Estadu Dezenvolvimentu Lokál, Mateus dos Santos Tallo ho Prezidenti Autoridade Munisípiu Ainaro no Kovalima, hatur fatuk dahuluk bá projeitu rehabilitasaun estrada husi Suku Casa, Munisípiu Ainaro bá Suku Webaba, Postu Adminsitrativu Zumalai, Munisípiu Kovalima, tersa-feira ne’e.

Antes tama bá hatur dahuluk, lia-nain sira husi suku Raimea ho Mape, Postu Administrativu Zumalai hala'o rituál kultura nian hodi husu matak malirin bá beiala sira.

Iha nia deskursu hafoin lansa hatur tiha fatuk dahuluk bá projeitu rehabilitasaun estrada, Ministru Obras Públiku, Samuel Marçal, husu bá komunidade, joven no autoridade lokál sira, ne’ebé hela besik iha area konstrusaun hotu-hotu iha dever atu tau matan bá obra ida ne'e, bainhira obra ne’e remata, obra ne’e sei fó benefísiu bá populasaun husi munisípiu rua ne'e.

“Hafoin ita hatur tiha fatuk dahuluk bá projeitu rehabilitasaun estrada husi Suku Casa, Munisípiu Ainaro bá Suku Webaba, Postu Adminsitrativu Zumalai, Munisípiu Kovalima, ha’u husu bá autoriedade lokál ho komunidade hotu tenke tau matan bá obra ne'e. Ne'ebé ohin ofisialmente ita lansa, konstrusaun Estrada ne’e konstrui durante tinan ida. Osan ne’ebé uja bá projeitu ida ne'e, osan povu nian, povu ida ne'e maka luta fó sira nia vida tomak hodi hetan ukun rasik aan, tanba ne'e ohin ita mai iha ne'e partisipa no involve sente katak, projeitu ida ne'e ita hotu nian, tan ne'e ita hotu tenke tau matan, "hateten Ministru Obras Públikas iha nia deskursu.

Ministru Obras Públikas haktuir, rehabilitasaun estrada husi Casa, Ainaro bá Webaba, Kovalima ne’ebé lansa ona ne’e konstrui husi empreza Aitula, Unipessoal,lda no China Overseas Engineering Group Co., Ltd. (COVEC).

“Tanba ne’e Ha’u husu bá empreza rua ne’e, bainhira ezekuta projeitu rehabilitasaun estrada ne’e tenke ezekuta tuir kontratu, tenke halo ho kualidade, husu mós bá PAM na'in rua atu tau matan hodi obra ne’e bele halo lalais bá komunidade sira, labele tuda ema nia ekipamentus,tesi ema nia fiu makina nian,tanba makina sira nee sosa karun hodi bele halo dezenvolvimentu diak ba ita nia rai rasik, tenik Ministru Obras Públikas.

Iha fatin hanesan, Prezidenti Autoridade Munisípiu Ainaro, Manuela Georgina Carmo Bucar Corte Real, lori povu husi Munisípiu rua agradese bá Governu liu hus Ministru obras publika.

“Agradese wain bá Governu liu husi Ministériu obras publika, ami kontenti tebes reprezenta povu Ainaro suku Cassa espresa ami nia kontenti, tanba estrada ne’e prinsipál tebes bá atividade hotu ohin halo lansamentu bá estrada ainaru Cassa liga bá Covalima Zumalai ne’ebé mak durante ne’e sai preokupasaun bá komunidade sira povu iha Munisípiu rua ne’e, ”tenik PAM Ainaru.

Nia mós husu bá empreza sira tenke halo ho kualidade, laos deit obras publika mak tun halo akompaña maibe pam mós akompaña.

“Laos deit Obras Publikas deit mak tun akompaña imi maibe ami prezidenti autoridade mós iha obrigasaun akompaña ita boot sira halo hotu lalais atu nune’e ita nia komunidade sira liu bá mai lori sira nia produtu bele lao ho livre, seguru ho kondisaun estrada ne’ebé mak diak”, hateten PAM Ainaru.

Iha sorin seluk, Prezidenti Autoridade Munisípiu Covalima, Miguel Armada Cardoso, hato’o Bemvindo no agradese bá Ministru Obras Públikas no membru Governu balun ne’ebé marka prezensa iha seremónia hatur fatuk dahuluk bá projeitu rehabilitasaun estrada iha Munisípiu Ainaru no Covalima.

“Iha tinan hirak nia laran ami halerik, maibe ohin liu husi lansamentu fatuk dahuluk ida ne’e bele halo kmaan komunidade sira hodi bele asesu Estrada ne’ebé diak, ha’u fiar katak tinan ida ka rua bainhira projeitu ne’e remata ona komunidade sira sei la halerik tan bá estrada, tanba ne’e husu bá kualker se deit ita hotu tenke tau matan hodi obra ne’e bele lao ho diak,” dehan PAM Covalima.

Entretantu projeitu rehabilitasaun ne'e iha pakote rua, pakote ida kaer husi Kompañia Aitula Lda.Timor-Leste ho Orsamentu montante $4.023,143.73, pakote ida kaer husi Kompañia Xina Overseas Engineering Group,Co.Ltd Xina, ho Orsamentu $4,856,254.24, rehabilitasaun estrada husi Ainaru Cassa liga bá Zumalai, ho nia durasaun tinan ida.

*𝗠𝗶́𝗱𝗶𝗮-𝗠𝗢𝗣