Gleno, 28 Novembru 2025

Ministru Transportes no Komunikasaun, Eng.Miguel Marques Gonçalves Manetelu, akompaña husi Prezidente Autoridade Munusípiu Ermera José Martinho dos Santos Soares to’o iha fatin serimónia solene Aniversáriu bá dala-50 Proklamasaun Unilaterál Independénsia Repúblika Demokrátika Timor-Leste iha oras tuku 08:50 OTL.

Serimónia ne'e hala’o Isár Bandeira Nasionál ne'e hala’o iha Kampu Demokrásia Glenu.

Antes hahú serimónia inspetór bá serimónia Ministru Manetelu hala’o uluk pasa revista bá forsa parada kompostu husi F-FDTL, PNTL, Seguransa Sivíl, Bombeiru, APC, Guarda Floresta, Estudante no Funsionáriu Públiku.

Korpu Isár Bandeira Nasionál bá komemorasaun Aniversáriu Proklamasaun Unilaterál Independénsia RDTL bá dala-50 mai husi Eskola Sekundáriu Jerál Nino Konis Santana Ermera no responsabeliza Koru mai husi Eskola Téknika Vokasionál Ernesto Fernandes "DUDU".

Iha okaziaun ne’e Ministru Manetelu Lee diskursu Prezidente Repúblika José Ramos-Horta hodi presta omenajen bá joven mehi-na’in sira iha tinan 1975 nian no mós bá mártir sira ne’ebé ho korajen hahú harii soberania Timor-Leste nian. Hodi reflete kona-bá espíritu korajen husi jeresaun iha tempu ne’ebá nian ne’ebé la kursu boot ho esperitu patriotismu no nasionalismu hodi proklama Indepedénsia RDTL iha situasaun ne’ebé defísil iha momentu ne’ebá.

Ho afirmasaun Saudozu Prokalamadór Francisco Xavier do Amaral no sira seluk iha momentu ne’ebá ho forsa loloos hodi hakerek istória Timor-Leste nian ne’ebé harii iha silénsiu no iha sakrifísiu, hodi transforma moras husi pasadu nian sai nu’udar fundasaun bá Estadu Direitu Demokrátiku modernu ida.

Aleinde ne’e mós reafirma Timor-Leste nia kompromisu bá liberdade, unidade, dezenvolvimentu no dignidade Povu Timor-Leste nian. Erói no martires sira nia sakrifísiu iha momentu ne’ebá sai ezemplu ida nomos sira inspira Timoroan ida-idak atu kontribui ho serbisu no determinasaun, hodi harii Timor-Leste ida ne’ebé prósperu, modernu no hetan respeitu.

Hafoin serimónia kontinua kedas ho atribuisaun premiu bá manan nain sira iha kompetisaun dada tali entre suku, jogu futsal no atividade sira seluk tan.

Serimónia Isár Bandeira Nasionál ne'e partisipa husi, Veteranus, Estudante, PNTL, F-FDTL, entidade estadu sira iha Gleno no komunidade sira.

𝐌𝐞́𝐝𝐢𝐚 𝐌𝐓𝐊