Manufahi, 01 Dezembru 2025; Vise-Ministru ba Operasionalizasaun Ospitál (VMOH-sigla portugés), dr Flávio Brandão Mendes de Araújo partisipa iha serimónia komemorasaun loron Mundiál HIV-SIDA ho tema Internasionál “Hakat liu dezafiu sira, haforsa sistema hodi kombate SIDA” no tema Nasionál “Mai ita hamutuk kombate transmisaun Virus HIV iha Timor-Leste” ne’ebé hala’o iha, Same Vila Munsípiu Manufahi.

Loron Mundiál HIV-SIDA 1 dezembru, hanesa loron ida-ne’ebé importante atu komemora tinan-tinan hodi konsolida no inspira ema hotu atu kontinua luta nafatin kontra problema HIV-SIDA.

“Ita selebra maibé tenki refleta aktus saida mak ita bele halo ba oin nune’e ita bele tane fali ita-nia ukun rasik-aan ne’e ho di’ak iha jerasaun tuir mai, moras HIV-SIDA no Tuberkuloze ne’e ho karaktér hanesan moras ida-ne’ebé kria stigma no diskriminasaun forte iha sosiedade maibé moras ida-ne’ebé mós nonók-nonók maibé impaktu jerasionál," dehan VMOH.

Iha serimónia ne’e VMOH kongratula mós ba INCSIDA hanesan autoridade nasionál ida atu kombate moras HIV-SIDA no iha aktus sira tuir mai tenki haree fila-fali mekanizmu resposta ida-ne’ebé apropriadu ba moras ne’e iha ita-nia rain.

“Momentu ba oin hafanu ita katak iha salvasaun ida, ita tenki sai ona husi pensamentu paradigma antiga ida-ne’ebé dehan moras ne’e la kura, moras ne’e diskrimina, moras ne’e la kontrola, ida ne’e ita sei haki’ak iha ita-nia ulun entaun ita mak haboot duni hanesan ita-nia esperiénsia atua tuberkuloze iha ita-nia rain, ne’e la’os opsaun maibé pensamentu ida soe hela ba entidades sira-ne’ebé servisu iha área ida-ne’e atu halo diskusaun kle'an iha nia resposta ba moras ne’e iha tinan sira oin mai atu bele efetivu liu, no ita hotu fiar katak ho ita-nia esforsu hotu, hasa’e konsiénsia katak sex arbiru ne’e traisaun ba ha’u nia-aan, konsiénsia ida-ne’e mak tenki hi'it.”

Iha biban ne'e VMOH agradese mós ba autoridade munisípiu ne’ebé fó suporta tomak ba atividade ne’e. Mai ita hotu hamutuk haree moras HIV-SIDA ne’e sai moras ida ameasa jerasionál, ameasa ba ita-nia jerasaun sira tuir mai, ita hotu iha responsabilidade atu tane ita-nia ukun rasik-aan ne’e ho di’ak no dignu atu bele lori TL ida saudável ba timoroan ne’ebé sei saudável iha futuru.