Dili, 02 Dezembru 2025

Ministru Transportes no Komunikasaun tersa ohin, simu vizita kortézia husi Embaixador Repúblika Indonézia bá Repúblika Demokrátika Timor-Leste, Okto Dorinus Manik, iha gabinete Ministru Kaikoli Dili.

Ministru Manetelu fó benvindu bá Embaixadór Okto hodi halo mós diskusaun konstrutivu sira kona-bá área xave oi-oin husi kooperasaun bilaterál iha setór transporte no komunikasaun sira.

Enkontru ne’e destaka progresu rehabilitasaun ne’ebé la’o hela bá Aeroportu Internasionál Prezidente Nicolau Lobato, ne’ebé hala’o husi empreza Indonézia Waskita karya.

Parte rua rekoñese nesesidade bá koordenasaun ne’ebé forte liu, Embaixadór Okto kompromete atu halo akompañamentu ho instituisaun relevante sira iha Indonézia.

Embaixadór aborda mós kona-bá estensaun Memorandu Entendimentu kona-bá Transporte entre nasaun rua ne’ebé kaduka ona, hodi nota ninia kompromisu atu halo ligasaun ho Ministériu Transporte Indonézia nian hodi avansa prosesu asinatura.

Diskusaun seluk tan inklui vizita bá grupu servisu Indonesia nian sira kona-bá postu, telekomunikasaun no dezenvolvimentu dijitál sira iha Ministériu Komunikasaun no dijitál Indonézia nian oin mai no mós atualizasaun sira kona-bá esforsu sira ne'ebé hala'o iha Indonézia nian hafoin asina MoU ho CTL, E.P.

Embaixador Okto hato'o mós interese Wings Air Indonézia nian hodi aplika bá rota voo Kupang-Dili-Kupang, hodi subliña intensaun kompañia aérea nian atu hasa'e konetividade aérea entre nasaun rua ne'e.

Ministru Manetelu mós apresia vizita Embaixador nian no reforsa kompromisu Ministériu nian atu rezolve kestaun sira ne'ebé aprezenta ona, tuir enkuadramentu legál sira ne'ebé eziste ona iha Timor-Leste.

Vizita ne’e marka Embaixador Okto nia vizita kortezia ikus nian bá Ministru Manetelu bainhira nia konklui nia misaun diplomátika iha Timor-Leste.

Ministru Manetelu hato'o nia agradesimentu bá Embaixador Okto Dorinus nia kontribuisaun sira hodi hametin kooperasaun bilaterál no dezeja susesu iha nia esforsu sira iha futuru.

𝐌𝐞́𝐝𝐢𝐚 𝐌𝐓𝐊